1Cor 4 | PONPDN | STEP | ARAMAS akan en wia kin kit papa en Kristus o saunkoa pan me rir akan ren Kot.

1 Corinthians 4

1 ARAMAS akan en wia kin kit papa en Kristus o saunkoa pan me rir akan ren Kot. 2 A iaduen saunkoa kan? Amen amen en lelapok. 3 I sota insenoki, me komail de kapun en aramas kasaui ia da. Pein nai pil sota kasaui ia da. 4 Pwe sota me i pein asa, a kaidin met, me i pun kila, a Kaun o me kin kasaui ia da. 5 Ari, komail depa kasaui okot me mon a ansau, a lao Kaun o pan kotido, me pan kasansale dan marain okiok en me rotorot akan o kadiarokada lamalam en nan monioin akan, amen amen ap pan indandeki ren Kot. 6 Ri ai kan, mepukat i kin inda duen nai o Apolos, pwe komail en ale san kit, pwe amen ender lamelame, me a siki san me intinidier, pwe komail ender aklapalapaki amen, ap palian me teio. 7 Pwe is me mone kin uk? A sota, me mi re om, me koe sota aleer. A ma koe aleer meakaros, menda koe kin suaiki, likamata koe sota aleer? 8 Komail medier o kapwapwalar, o komail kin kaunda, ap sota ale san kit. I men, komail en kaunda, pwe kit ap pil pan ian komail kaunda. 9 Pwe i lamelame, me Kot kotin wiai on kit wanporon akan, en tikitik melel, me mau on mela, pwe kit wialar men kapuriamui eu ni sappa mon tounlan o aramas akan. 10 Kit me son en pweipwei pweki Kristus, a komail me lolekonki Kristus; kit me luet, a komail me kelail; komail me indand mau, a kit me indand sued. 11 Kokodo lel auer met kit mm manadar, o pil men nim piladar, o kiliso, o se kin kalokolok, o sota deu at. 12 O dodok ni pein pa at; kit me kalok sued, a se kin kapaiada, kit me kalokolok, a se kin nenen la; Ni at pakaraun mal, kit kin kapakap. 13 Kit wialar tatan kid o kopataun aramas karos. 14 I intiniedier mepukat kaidin pwen kanamenok komail, a pwen panaui komail nai seri kompok kan. 15 Pwe ma omail saunpadak pan Kristus me nen, nan sam omail akan me sota non toto, pwe nai me kaipwi komail ren Kristus Iesus ki ronamau. 16 I ari poeki re omail komail en idauen ia do. 17 Pwe i me i kadarki won komail Timoteus nai seri kompoke o lelapok pan Kaun o pwen kataman kin komail duen al ai kan pan Kristus, duen me i kawewedar ni momodisou karos. 18 Akai komail me aklapalap likomata i sota pan pwar won komail. 19 A i pan pwar won komail madan, ma Kaun o pan kotin kupura. I ap pan kilan kaidin padak en me aklapalap akan, a me manaman. 20 Pwe wein Kot sota mi ni kasoi a ni manaman. 21 Da me komail mauki? I en pwar won komail wa sokon, de limpok o nen en opampap?